ୟୁଏଇରେ ଆଇପିଏଲ ଆୟୋଜନକୁ ଭାରତ ସରକାରଙ୍କ ଚୂଡ଼ାନ୍ତ ମଂଜୁରୀ ; ଦୁବାଇ, ସାରଜାହା ଓ ଆବୁଧାବିରେ ଖେଳାଯିବ ଆଇପିଏଲର ସମସ୍ତ ମ୍ୟାଚ

କଳିଙ୍ଗ ଜ୍ୟୋତି ବ୍ୟୁରୋ ନୂଆଦିଲ୍ଲୀ ୧୧/୦୮: ଭାରତୀୟ କ୍ରିକେଟ୍ କଂଟ୍ରୋଲ ବୋର୍ଡ଼କୁ ଆଇପିଏଲ୍ ଆୟୋଜନ ନିମନ୍ତେ କେନ୍ଦ୍ର ସରକାର ବିଧିବଦ୍ଧ ମଞ୍ଜୁରୀ ଦେବା ପରେ ଲିଗ ଚେୟାରମ୍ୟାନ ବ୍ରିଜେଶ ପଟେଲ ଖେଳକୁ ନେଇ ସୂଚନା ଦେଇଛନ୍ତି । ସୋମବାର ଶ୍ରୀ ପଟେଲ ଦେଇଥିବା ସୂଚନା ଅନୁସାରେ ଆଇପିଏଲ୍ ୟୁଏଇର ୩ଟି ଷ୍ଟାଡ଼ିଅମରେ ହେବ ଏବଂ ୧୯ ସେପ୍ଟେମ୍ବରରୁ ଆରମ୍ଭ ହୋଇ ନଭେମ୍ବର ୧୦ରେ ଶେଷ ହେବ । ଶାରଜାହା, ଦୁବାଇ ଓ ଆବୁଧାବୀରେ ୩ଟି ଷ୍ଟାଡ଼ିଅମରେ ସମସ୍ତ ଖେଳ ହେବ ବୋଲି ସେ କହିଛନ୍ତି ।

ଗତ ସପ୍ତାହରେ ସରକାର ବିସିସିଆଇକୁ ୟୁଏଇରେ ଖେଳ ଆୟୋଜନ ନିମନ୍ତେ ସୈଦ୍ଧାନ୍ତିକ ମଞ୍ଜୁରୀ ଦେଇଥିଲେ । ତେବେ ଏ ସମ୍ପର୍କରେ ଲିଖିତ ମଞ୍ଜୁରୀ ଆଜି ମିଳିଛି ବୋଲି ବ୍ରିଜେଶ୍ ପଟେଲ ପିଟିଆଇକୁ ସୂଚନା ଦେଇଛନ୍ତି । ଭାରତର କୌଣସି କ୍ରୀଡ଼ା ସଙ୍ଗଠନ ବିଦେଶରେ ଖେଳ ଆୟୋଜନ କରିଥାଏ ସେଥିପାଇଁ ଗୃହ, ବିଦେଶ ଓ କ୍ରୀଡ଼ା ମନ୍ତ୍ରଣାଳୟର ଅନୁମତି ନେବା ଅପରିହାର୍ଯ୍ୟ । ବୋର୍ଡ଼ର ଜଣେ ଉଚ୍ଚ ଅଧିକାରୀଙ୍କ ସୂଚନା ଅନୁସାରେ ସରକାରଙ୍କ ମଞ୍ଜୁରୀ ମିଳିବା ଖବର ଆମେ ଏମିରେଟ୍ସ କ୍ରିକେଟ୍ ବୋର୍ଡ଼କୁ ସୂଚନା ଦେଇଛୁ ଏବଂ ଟିମ୍ ଗୁଡ଼ିକୁ ଏ ସମ୍ପର୍କରେ ଖବର ଜଣାଇ ଦିଆଯାଇଛି ।

ଅଧିକାଂଶ ଦଳ ୨୦ ଅଗଷ୍ଟ ପରେ ୟୁଏଇ ଅଭିମୁଖେ ଯାତ୍ରା କରିବେ ଏବଂ ଏହା ପୂର୍ବରୁ ସମସ୍ତ ଖେଳାଳିଙ୍କୁ ଆରଟି-ପିସିଆର ଟେଷ୍ଟ କରିବାକୁ ପଡ଼ିବ । ଚେନ୍ନଇ ସୁପରକିଙ୍ଗ ଆସନ୍ତା ୨୨ ତାରିଖରେ ୟୁଏଇ ଯାତ୍ରା କରିବ । ଚୀନ ମୋବାଇଲ୍ କମ୍ପାନୀ ଭିଭୋକୁ ପ୍ରାୟୋଜକରୁ ବାଦ ଦେବା ପରେ ଏବେ ଅନେକ କମ୍ପାନୀ ଆଇପିଏଲ୍ ପ୍ରାୟୋଜକ ହେବା ପାଇଁ ଆଗ୍ରହ ପ୍ରକାଶ କରିଛନ୍ତି । ରାମଦେବଙ୍କ କମ୍ପାନୀ ପତଞ୍ଜଳି ସହ ରିଲାଏନ୍ସ ଜିଓ, କୋକାକୋଲା, ବାୟଜୁ, ଆମାଜନ ଆଦି କମ୍ପାନୀ ଏହି ଦୌଡ଼ରେ ଆଗରେ ଅଛନ୍ତି ।