କଳିଙ୍ଗ ଜ୍ୟୋତି ବ୍ୟୁରୋ ନୂଆଦିଲ୍ଲୀ ୦୪/୦୭ : ରାଜ୍ୟସଭାରେ ମୌସୁମି ଅଧିବେଶନ ଅଗଷ୍ଟ ଶେଷ କିମ୍ବା ସେପ୍ଟେମ୍ବର ପ୍ରଥମ ସପ୍ତାହରେ ଅନୁଷ୍ଠିତ ହେବ। ଉଭୟ ଫିଜିକାଲ ଓ ଭର୍ଚୁଆଲ ଫ୍ଲାଟଫର୍ମରେ ଏହି ଅଧିବେଶନ ହେବ ବୋଲି ଜଣାଯାଇଛି। ଅର୍ଥାତ୍ ଅଧିବେଶନ ସମୟରେ ରାଜ୍ୟସଭାର କିଛି ସଦସ୍ୟଙ୍କୁ ଗୃହରେ ବସିବାକୁ ଅନୁମତି ଦିଆଯିବ ଓ ଅନ୍ୟ କେତେକ ଭିଡିଓ କନଫରେନ୍ସିଂ ମାଧ୍ୟମରେ ଉପସ୍ଥିତ ରହିବେ। ସାମାଜିକ ଦୂରତା ରକ୍ଷା କରିବା ପୂର୍ବକ ସଦସ୍ୟମାନଙ୍କୁ ଗୃହ ଓ ଗୃହର ଗ୍ୟାଲେରିରେ ବସିବାକୁ ଦିଆଯିବ। ଯେଉଁମାନେ ଭିଡିଓ କନଫରେନ୍ସିଂରେ ଉପସ୍ଥିତ ରହିବେ ସେମାନଙ୍କ ପାଇଁ ସେଣ୍ଟ୍ରାଲ ହଲ୍ କିମ୍ବା ବାଲଯୋଗୀ ଅଡିଟୋରିୟମ୍ରେ ବ୍ୟବସ୍ଥା କରାଯିବ। ଶୁକ୍ରବାର ରାଜ୍ୟସଭା ଅଧ୍ୟକ୍ଷ ଭେଙ୍କୟା ନାଇଡୁ ମୌସୁମୀ ଅଧିବେଶନ ଆୟୋଜନ ନେଇ ରହିଥିବା ବିଭିନ୍ନ ସୁବିଧା ସମ୍ପର୍କରେ ଆଲୋଚନା କରିଥିଲେ।
ରାଜ୍ୟସଭାର ଚାମ୍ବର ଓ ଗ୍ୟାଲେରୀରେ ସାମାଜିକ ଦୂରତା ରକ୍ଷାକରି ୧୨୭ ସଦସ୍ୟଙ୍କ ପାଇଁ ବସିବା ବ୍ୟବସ୍ଥା ହୋଇପାରିବ। ଅବଶିଷ୍ଟ ସଦସ୍ୟ ଭର୍ଚୁଆଲ ପ୍ଲାଟଫର୍ମ ମାଧ୍ୟମରେ ଉପସ୍ଥିତ ରହିବେ। ତେବେ ଗୃହରେ ପ୍ରଶ୍ନକାଳ, ମତଦାନ, ନୂଆ ସଦସ୍ୟଙ୍କ ଶପଥ ଗ୍ରହଣ ଆଦି ବିଭିନ୍ନ ଦିଗ ସମ୍ପର୍କରେ ଆଲୋଚନା କରାଯାଇଛି। ଏ ସମ୍ପର୍କରେ ସବିଶେଷ ଆକ୍ସନ ପ୍ଲାନ ଆଗାମୀ ସପ୍ତାହରେ ଉପସ୍ଥାପନ କରାଯିବ। ରାଜ୍ୟସଭା ଅଧିବେଶନର ସଫଳତା ପରେ ଲୋକସଭା ଅଧିବେଶନକୁ ଅନୁରୂପ ଭାବେ ଆୟୋଜନ କରାଯିବ।
