ଗାଙ୍ଗୁଲିଙ୍କର ପୁନର୍ବାର ଆଞ୍ଜିଓପ୍ଲାଷ୍ଟି କଲେ ଡାକ୍ତର, ଆଉ ୨ଟି ଷ୍ଟେଣ୍ଟ ଲାଗିଲା
କଲକାତା: ବିସିସିଆଇ ସଭାପତି ତଥା ଟିମ୍ ଇଣ୍ଡିଆର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ପୁନର୍ବାର ହୃଦଘାତ ଯୋଗୁ କଲକାତାର ଆପୋଲ ହସ୍ପିଟାଲରେ ଚିକିତ୍ସିତ ହେଉଛନ୍ତି। ମାସକ ମଧ୍ୟରେ ୨ୟ ଥର ପାଇଁ ହୃଦ୍ଘାତ ଯୋଗୁ ସେ ହସ୍ପିଟାଲରେ ଭର୍ତ୍ତି ହୋଇଥିବାବେଳେ ତାଙ୍କଠାରେ ପୁନର୍ବାର ଆଞ୍ଜିଓପ୍ଲାଷ୍ଟି କରାଯାଇଛି। ଏଥର ଆଉ ୨ଟି ଷ୍ଟେଣ୍ଟ୍ ଲଗାଯାଇଥିବା ପିଟିଆଇ ସୂତ୍ରରୁ ଜଣାପଡ଼ିଛି।
ଗତ ବୁଧବାର ଗାଙ୍ଗୁଲି ଅସୁସ୍ଥ ହୋଇପଡ଼ିବା ସହିତ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା। ଗତଥର ଗାଙ୍ଗୁଲି ହୃଦ୍ଘାତ ଯୋଗୁ ଉଡ୍ସଲ୍ୟାଣ୍ଡ ହସ୍ପିଟାଲରେ ଭର୍ତ୍ତି ହୋଇଥିଲେ। ସେତେବେଳେ ତାଙ୍କଠାରେ ଆଞ୍ଜିଓପ୍ଲାଷ୍ଟି କରାଯାଇ ଏକ ଷ୍ଟେଣ୍ଟ ଲଗାଯାଇଥିଲା। ଡାକ୍ତରମାନେ କହିଥିଲେ ଯେ, ଗାଙ୍ଗୁଲିଙ୍କର ୩ଯି ଧମନୀରେ ବ୍ଲକେଜ୍ ସୃଷ୍ଟି ହୋଇଛି। ସେଥିରୁ ଗୋଟିଏ ଧମନୀ ୯୦% ବ୍ଲକ ହୋଇଯାଇଥିଲା।
ପୁନର୍ବାର ଆଞ୍ଜିଓପ୍ଲାଷ୍ଟି ହେବା ପରେ ଗୁରୁବାର ଗାଙ୍ଗୁଲିଙ୍କର ଚିକିତ୍ସା ସମ୍ବନ୍ଧୀୟ ସମସ୍ତ ପ୍ରକାର ଯାଞ୍ଚ କରାଯିବ। ଏହା ପରେ ତାଙ୍କର ଆଗାମୀ ଚିକିତ୍ସା ପ୍ରକ୍ରିୟା ଚାଲିବ ବୋଲି ହସ୍ପିଟାଲର ବରିଷ୍ଠ ଡାକ୍ତରମାନେ ବିବୃତି ଜାରି କରି ସୂଚନା ଦେଇଛନ୍ତି।
