ଝିଅ ‘ଦେଶଦ୍ରୋହୀ’ ବୋଲି କହିବା ପରେ ବାପାଙ୍କୁ ‘ଅତ୍ୟାଚାରୀ’ କହିଲେ ଶେହଲା
ଜାମ୍ମୁ: କାଶ୍ମୀର ପ୍ରସଙ୍ଗକୁ ନେଇ ଜେଏନୟୁର ପୂର୍ବତନ ଛାତ୍ରନେତ୍ରୀ ଶେହଲା ରଶୀଦ ଏବଂ ତାଙ୍କ ବାପା ଅବଦୁଲ ଆର. ଶୋରାଙ୍କ ମଧ୍ୟରେ ଲଢ଼େଇ ଚାଲିଛି। ଶେହଲା କାଶ୍ମୀରକୁ ନେଇ ଦେଶ ବିରୋଧୀ କାର୍ଯ୍ୟକଳାପରେ ଲିପ୍ତ ଥିବା ଏବଂ ବିଚ୍ଛିନ୍ନତାବାଦୀମାନଙ୍କଠାରୁ ଟଙ୍କା ନେଇଥିବା ନେଇ ତାଙ୍କ ବାପା ଶୋରା ଅଭିଯୋଗ କରିବା ସହିତ ଏହାର ତଦନ୍ତ ଦାବି କରିଛନ୍ତି।
ଏହା ପରେ ଶେହଲା ତାଙ୍କ ବାପାଙ୍କ ବିରୋଧରେ କଡ଼ା ମନ୍ତବ୍ୟ ଦେଇ ସେ ଜଣେ ଅତ୍ୟାଚାରୀ ବୋଲି କହିଛନ୍ତି। ତାଙ୍କ ବାପା ଶୋରା ପତ୍ନୀଙ୍କୁ ମାରପିଟ୍ କରିବା ସହିତ ଘରୋଇ ହିଂସା ନେଇ କୋର୍ଟରେ ତାଙ୍କ ନାମରେ ମାମଲା ଚାଲିଥିବା ଶେହଲା କହିଛନ୍ତି।
ସୂଚନାଯୋଗ୍ୟ, ଶୋରା ଗତ ସୋମବାର ନିଜ ଝିଅ ଶେହଲାଙ୍କ ବିରୋଧରେ ଗୁରୁତର ଅଭିଯୋଗ କରିଥିଲେ। ଶେହଲା ଏହାକୁ ଖଣ୍ଡନ କରିବା ସହିତ କୋର୍ଟ ତାଙ୍କ ବାପାଙ୍କୁ ଘରେ ପ୍ରବେଶ ନ କରିବାକୁ ନିର୍ଦେଶ ଦେଇଛନ୍ତି। ଏହି ରାୟର ଏକ ଆଦେଶନାମାକୁ ଶେହଲା ଟ୍ବିଟର୍ରେ ଶେୟାର କରିଛନ୍ତି।
ଅନ୍ୟପଟେ ଶୋରା ଜାମ୍ମୁ ପୁଲିସ ମହାନିର୍ଦେଶକଙ୍କୁ ଏକ ଅଭିଯୋଗପତ୍ର ପଠାଇଛନ୍ତି। ସେଥିରେ ସେ ତାଙ୍କ ଝିଅ ଶେହଲା ରଶୀଦ ଏବଂ ଆଇଏଏସ ଟପ୍ପର ଶାହ ଫୈଜଲଙ୍କ ସହିତ ମିଶି କାଶ୍ମୀରରେ ହୁରିୟତ୍ ଭଳି ଗଡ଼ ଛିଡ଼ା କରିବାକୁ ଉଦ୍ୟମ କରୁଛନ୍ତି। କୌଶଳ କରି କାଶ୍ମୀର ଯୁବକମାନଙ୍କୁ ବିଚ୍ଛିନ୍ନତାବାଦୀଙ୍କ ସହିତ ଯୋଡ଼ିବାକୁ ଯୋଜନା କରୁଛନ୍ତି। ଶେହଲା, ତା’ର ମା’ ଏବଂ ଅଙ୍ଗରକ୍ଷୀ ଘରେ କେଉଁପରି କାର୍ଯ୍ୟକଳାପରେ ଲିପ୍ତ ରହୁଛି ତା’ର ତଦନ୍ତ କରାଇବା ଉଚିତ ବୋଲି ଶୋରା ଦାବି କରିଛନ୍ତି।
ଶୋରା ଆହୁରି କହିଛନ୍ତି, ବାପା ହିସାବରେ ମୁଁ ଶେହଲାକୁ ବିରୋଧ କରିବାକୁ ସେ ତା’ ଭଉଣୀ ଏବଂ ବା’ ସହିତ ମିଶି ମୋ ବିରୋଧରେ ଘରୋଇ ହିଂସା ମାମଲା ରୁଜୁ କରିଛନ୍ତି। ଏବେ ତାଙ୍କ ଜୀବନ ପ୍ରତି ବିପଦ ରହିଛି। ଏଥିପାଇଁ ସେ ଡିଜିପିକୁ ଅଭିଯୋଗପତ୍ର ପଠାଇଛନ୍ତି।
