କଳିଙ୍ଗ ଜ୍ୟୋତି ବ୍ୟୁରୋ ନୂଆଦିଲ୍ଲୀ ୦୩/୦୯ : ହ୍ୟାକ୍ ହେଲା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବ୍ୟକ୍ତିଗତ ଟ୍ୱିଟର ଆକାଉଣ୍ଟ। ପ୍ରଧାନମନ୍ତ୍ରୀଙ୍କ ଆକାଉଣ୍ଟ ହ୍ୟାକ କରିବା ପରେ ହ୍ୟାକର ଆକାଉଣ୍ଟ ଜରିଆରେ କୋଭିଡ -୧୯ ରିଲିଫ ପାଣ୍ଠି ପାଇଁ ବିଟକଏନ୍ ଦାବି କରିଥିବା ସାମ୍ନାକୁ ଆସିଛି। ତେବେ ଟୁଇଟଟି କିଛି ସମୟ ପରେ ହଟାଇ ଦିଆଯାଇଥିବା ଜଣା ପଡ଼ିଛି। ବୁଧବାର ବିଳମ୍ବିତ ରାତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବ୍ୟକ୍ତିଗତ ୱେବସାଇଟ୍ (@narendramodi_in)ର ଟ୍ୱିଟର ଆକାଉଣ୍ଟ ହ୍ୟାକରମାନେ ହ୍ୟାକ୍ କରିଥିଲେ। କିନ୍ତୁ ଏହାକୁ ଖୁବ୍ ଶୀଘ୍ର ଟୁଇଟର ପକ୍ଷରୁ ଠିକ୍ କରାଯାଇଥିଲା | ବର୍ତ୍ତମାନ ଟ୍ୱିଟରରୁ ଏକ ବିବୃତ୍ତି ଆସିଛି, ଯେଉଁଥିରେ ସେ ହ୍ୟାକିଂ ମାମଲାକୁ ଗ୍ରହଣ କରିଛନ୍ତି। ଟ୍ୱିଟର ମୁଖପାତ୍ରଙ୍କ ଅନୁଯାୟୀ, ଆମେ ଏହି ଘଟଣାର ପୁଙ୍ଖାନୁପୁଙ୍ଖ ଅନୁସନ୍ଧାନ କରୁଛୁ, ତଥାପି ଏହି ଆକାଉଣ୍ଟ ବ୍ୟତୀତ ଅନ୍ୟ କୌଣସି ଆକାଉଣ୍ଟ ହ୍ୟାକ ହୋଇଛି କି ନାହିଁ ତାହା ଏପର୍ଯ୍ୟନ୍ତ ଜଣା ପଡିନାହିଁ।
ପ୍ରଧାନମନ୍ତ୍ରୀଙ୍କ ବ୍ୟକ୍ତିଗତ ୱେବସାଇଟର ଟ୍ୱିଟର ଆକାଉଣ୍ଟରୁ କ୍ରିପ୍ଟୋ ମୁଦ୍ରା ସହ ଜଡିତ ଟ୍ୱିଟ୍ କରାଯାଇଥିଲା। ଟ୍ୱିଟର ଆକାଉଣ୍ଟରେ ଲେଖାଯାଇଥିବା ଏକ ବାର୍ତ୍ତାରେ, ମୁଁ ଆପଣଙ୍କୁ ଅନୁରୋଧ କରୁଛି ଯେ, କୋଭିଡ -୧୯ ପାଇଁ ପ୍ରଧାନମନ୍ତ୍ରୀ ଜାତୀୟ ରିଲିଫ ପାଣ୍ଠିକୁ ଦାନ କରନ୍ତୁ ବୋଲି ଲେଖିଥିଲା ହ୍ୟାକର। ଅନ୍ୟ ଏକ ଟ୍ୱିଟରେ ହ୍ୟାକର ଲେଖିଥିଲା ଯେ, ଏହି ଆକାଉଣ୍ଟକୁ ଜନ୍ ୱିକ୍ ([email protected])ହ୍ୟାକ୍ କରିଛି। ଆମେ ପେଟିଏମ୍ ମଲ୍ ହ୍ୟାକ୍ କରିନାହୁଁ | ତେବେ ବର୍ତ୍ତମାନ ଏହି ବୋଗସ୍ ଟ୍ୱିଟ୍ ଡିଲିଟ୍ ହୋଇଯାଇଛି |
ସୂଚନା ମୁତାବକ, ଅଗଷ୍ଟ ୩୦ରେ ସାଇବର ସୁରକ୍ଷା ସଂସ୍ଥା ସାଇବଲ ଦାବି କରିଥିଲା ଯେ, ପେଟମ ମଲରୁ ତଥ୍ୟ ଚୋରିରେ ଜନ୍ ୱିକ୍ ଗ୍ରୁପ୍ ସମ୍ପୃକ୍ତ ଥିଲା। ପେଟିଏମ୍ ମଲ୍ ୟୁନିକର୍ଣ୍ଣ ହେଉଛି ପେଟିଏମର ଇ-କମର୍ସ କମ୍ପାନୀ। ସାଇବଲ ଦାବି କରିଥିଲା ଯେ, ଏହି ହ୍ୟାକର୍ ଗୋଷ୍ଠୀ ଟଙ୍କା ପାଇଁ ଦାବି କରିଥିଲେ। ତେବେ ଅନୁସନ୍ଧାନ ବେଳେ ତଥ୍ୟରେ ଚୋରି ଭଳି କୌଣସି ଘଟଣା ଘଟି ନ ଥିବା ପେଟିଏମ୍ ସ୍ପଷ୍ଟ କରିଥିଲା।
ଜୁଲାଇରେ ଏଭଳି ଏକ ଘଟଣା ସାମ୍ନାକୁ ଆସିଥିଲା ଯେଉଁଥିରେ ୱାରେନ୍ ବଫେଟ୍, ଜେଫ୍ ବେଜୋସ୍, ବରାକ ଓବାମା, ଜୋ ବିଡେନ, ବିଲ୍ ଗେଟ୍ସ ଏବଂ ଏଲୋନ୍ ମସ୍କଙ୍କ ସମେତ ଅନେକ ବଡ ବ୍ୟକ୍ତିତ୍ୱଙ୍କ ଟ୍ୱିଟର ଆକାଉଣ୍ଟ ହ୍ୟାକ କରାଯାଇଥିଲା। ଏମାନଙ୍କ ଆକାଉଣ୍ଟ ଜରିଆରେ କ୍ରିପ୍ଟୋ ମୁଦ୍ରା ସମ୍ବନ୍ଧୀୟ ଟ୍ୱିଟ କରାଯାଇଥିଲା |
