ରାଜସ୍ଥାନ ପିସିସି ମୁଖ୍ୟ ଏବଂ ଉପମୁଖ୍ୟମନ୍ତ୍ରୀ ପଦରୁ ବିଦା ହେଲେ ସଚିନ ପାଇଲଟ,ଅନ୍ୟ ୨ ମନ୍ତ୍ରୀ ବି ବରଖାସ୍ତ
ନୂଆଦିଲ୍ଲୀ, (କଳିଙ୍ଗ ଜ୍ୟୋତି ବ୍ୟୁରୋ),୧୪/୦୭ : ଆକ୍ସନ ମୁଡରେ କଂଗ୍ରେସ ହାଇକମାଣ୍ଡ । ରାଜସ୍ଥାନ ପିସିସି ମୁଖ୍ୟ ଏବଂ ଉପମୁଖ୍ୟମନ୍ତ୍ରୀ ପଦରୁ ବିଦା ହେଲେ ସଚିନ ପାଇଲଟ । ଏନେଇ ସୂଚନା ଦେଇଛନ୍ତି କଂଗ୍ରସର ଜାତୀୟ ମୁଖପାତ୍ର ରଣଦୀପ ସୂର୍ଜେୱାଲା । ଗତ କିଛି ଦିନ ଧରି ରାଜସ୍ଥାନ କଂଗ୍ରେସରେ ଦେଖାଦେଇଥିବା ବିବାଦ ଅତି ଉଷ୍ଣ ରହିଥିଲା । ଏପରିକି ଗେହଲଟ ସରକାର ରହିବ ନା ଯିବ ତାକୁ ନେଇ ଚାଲିଥିଲା ଅଙ୍କକଷା । ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ ଉପମୁଖ୍ୟମନ୍ତ୍ରୀ ସଚିନ୍ ପାଇଲଟଙ୍କ ମଧ୍ୟରେ ବିବାଦ ତେଜିବା ଭିତରେ ଗତ ଦୁଇ ଦିନ ଧରି କଂଗ୍ରସ ବିଧାୟକ ଦଳ ବୈଠକ ଡାକିଥିଲା ଦଳ । ମୁଖ୍ୟମନ୍ତ୍ରୀ ଗେହଲଟଙ୍କ ଦ୍ୱାରା ଆହୁତ ବୈଠକରୁ ଦୂରେଇ ରହିଥିଲେ ସଚିନ ପାଇଲଟ୍ ।
କଂଗ୍ରେସର ଶୀର୍ଷ ନେତୃତ୍ୱ ମଧ୍ୟ ସଚିନ ପାଇଲଟଙ୍କ ସହ ସଂପର୍କ କରିବାକୁ ଉଦ୍ୟମ କରିଥିଲେ । ତେବେ ପାଇଲଟଙ୍କ ସହ କୌଣସି ଯୋଗାଯୋଗ ହୋଇପାରନଥିବା ସୂଚନା ରହିଛି ।
ଏହାରି ଭିତରେ ରାଜସ୍ଥାନ କଂଗ୍ରେସର ଟାଣୁଆ ତଥା ଯୁବ ଚେହେରା ସଚିନ ପାଇଲଟଙ୍କୁ ଦଳ ରାଜସ୍ଥାନ ପ୍ରଦେଶ କଂଗ୍ରେସ ମୁଖ୍ୟ ତଥା ଉପମୁଖ୍ୟମନ୍ତ୍ରୀ ପଦରୁ ବିଦା କରିଛି କଂଗ୍ରେସ । ଏପରି ସ୍ଥିତିରେ ସେପଟେ ରାଜସ୍ଥାନ ରାଜ୍ୟପାଳଙ୍କୁ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ସାକ୍ଷାତ କରିଥିବା ସୂଚନା ଆସିଛି ।
ସଚିନ ପାଇଲଟଙ୍କ ସମର୍ଥନରେ ୩୦ ବିଧାୟକ ରହିଥିବା ତାଙ୍କର ସମର୍ଥକ ଦାବି କରିଛନ୍ତି । ବହିଷ୍କାର ପରେ ସଚିନ ପ୍ରତିକ୍ରିୟା ଦେଇ ଟ୍ୱିଟ କରି କହିଛନ୍ତି ଯେ “ସତ୍ୟକୁ ହଇରାଣ କରାଯାଇପାରେ, ପରାଜିତ ନୁହେଁ ।”
