![greentech](https://i0.wp.com/kalingajyoti.com/wp-content/uploads/2022/07/greentech2.jpg?w=1170&ssl=1)
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗୁରୁବାର ନୂଆ ସଂସଦ ଭବନର ଶିଳାନ୍ୟାସ କରିଛନ୍ତି। ଏହି ନୂଆ ସଂସଦ ଭବନ ‘ଆତ୍ମନିର୍ଭରଶୀଳ ଭାରତ’ର ସାକ୍ଷୀ ହେବ ବୋଲି ଏହି ଅବସରରେ ପ୍ରଧାନମନ୍ତ୍ରୀ କହିଛନ୍ତି। ସେ କହିଛନ୍ତି, ସଂସଦ ଭବନରେ ଆମ ଦେଶ ଏବଂ ସମ୍ବିଧାନର ନିର୍ମାଣ ହୋଇଛି। ଆମ ସଂସଦ ଭବନ ଦେଶର ଉନ୍ନତି, ଅବନ୍ନତି, ଆଶା ଆକାଂକ୍ଷା ଏବଂ ଦୀର୍ଘପଥ ଯାତ୍ରାର ପ୍ରତୀକ ହୋଇ ରହିଛି। ଏସବୁ ଆମର ଐତିହ୍ୟ, କିନ୍ତୁ ସଂସଦର ଶକ୍ତିଶାଳୀ ଇତିହାସ ସହିତ ବାସ୍ତବତାକୁ ମଧ୍ୟ ଗ୍ରହଣ କରିବା ଆବଶ୍ୟକ।
![](https://i0.wp.com/kalingajyoti.com/wp-content/uploads/2020/12/eo3e4asuwaazfz6-1607586873.jpg?resize=586%2C329&ssl=1)
ମୋଦୀ ଆହୁରି କହିଛନ୍ତି, ସମୟର ଆବଶ୍ୟକତା ସହିତ ଏହି କୋଠାର ନବୀକରଣ ପାଇଁ ଅନେକ ପ୍ରୟାସ କରାଯାଇଛି। ସାଉଣ୍ଡ, ଆଇଟି, ସୁରକ୍ଷା ବ୍ୟବସ୍ଥାକୁ ନବୀକରଣ କରାଯାଇଛି। କାନ୍ଥ ମଧ୍ୟ ଅନେକ ଥର ଭାଙ୍ଗିଯାଇଛି। କିନ୍ତୁ ବର୍ତ୍ତମାନ ଏହି କୋଠା ବିଶ୍ରାମ ନେବାକୁ ଚାହୁଁଛି।
![](https://kalingajyoti.com/wp-content/uploads/2020/12/New-Parliament-House-1.jpg)
ନୂଆ ସଂସଦ ଭବନରେ ଅନେକ ନୂତନ କାର୍ଯ୍ୟ କରାଯାଉଛି। ଏଠାରେ ସାଂସଦଙ୍କ ଦକ୍ଷତା ବୃଦ୍ଧି ପାଇବ। ଆଧୁନିକ ପଦ୍ଧତିରେ କାର୍ଯ୍ୟ ହେବ। ଯେତେବେଳେ ନାଗରିକମାନେ ସାଂସଦଙ୍କୁ ଭେଟିବାକୁ ଆସନ୍ତି, ସେତେବେଳେ ସେମାନଙ୍କୁ ବହୁତ ଅସୁବିଧାର ସମ୍ମୁଖୀନ ହେବାକୁ ପଡ଼େ। ସଂସଦ ଗୃହରେ ସ୍ଥାନର ଅଭାବ ରହିଛି। କିନ୍ତୁ ଭବିଷ୍ୟତରେ ପ୍ରତ୍ୟେକ ସାଂସଦଙ୍କ ପାଇଁ ଏପରି ବ୍ୟବସ୍ଥା ହେବ, ଯାହାଦ୍ବାରା ସେ ତାଙ୍କ ନିର୍ବାଚନମଣ୍ଡଳୀରୁ ଆସୁଥିବା ଲୋକଙ୍କୁ ଭେଟି ପାରିବେ।
![](https://i0.wp.com/kalingajyoti.com/wp-content/uploads/2020/12/2cc0a4f9-3f01-4c3b-9c36-ed8439d89d27.jpg?resize=586%2C329&ssl=1)
ପ୍ରଧାନମନ୍ତ୍ରୀ କହିଛନ୍ତି ଯେ, ନୂତନ ସଂସଦ ଭବନ ‘ଆତ୍ମନିର୍ଭରଶୀଳ ଭାରତ’ର ସାକ୍ଷୀ ହେବ। ପୁରୁଣା କୋଠା ଦେଶର ଆବଶ୍ୟକତା ପୂରଣ କରିଥିଲା। କିନ୍ତୁ ନୂତନ ସଂସଦ ଭବନ ଏକବିଂଶ ଶତାବ୍ଦୀର ଆକାଂକ୍ଷା ପୂରଣ କରିବ। ଆମେ ଦେଶବାସୀ ମିଳିତ ଭାବେ ଆମ ସଂସଦର ଏହି ନୂତନ କୋଠା ନିର୍ମାଣ କରିବୁ। ଭାରତ ଯେତେବେଳେ ସ୍ୱାଧୀନତାର ୭୫ ବର୍ଷ ପାଳନ କରିବ, ସେତେବେଳେ ଆମ ସଂସଦର ନୂତନ କୋଠା ପ୍ରସ୍ତୁତ ହୋଇସାରିଥିବ, ତା’ଠାରୁ ଆଉ ଅଧିକ ସୁନ୍ଦର କଥା କ’ଣ ହେବ, ଅଧିକ ପବିତ୍ର କ’ଣ ହେବ। ନୂଆ ସଂସଦ ଭବନ ସେହି ଉତ୍ସବରେ ପ୍ରକୃତ ପ୍ରେରଣା ସାଜିବ ବୋଲି ମୋଦୀ କହିଛନ୍ତି।