କଲକାତା : ପଶ୍ଚିମବଙ୍ଗ ନିର୍ବାଚନ ପୂର୍ବରୁ ବିଜେପି ରାଜ୍ୟରେ ନିଜର ସ୍ଥିତିକୁ ଆହୁରି ମଜବୁତ କରିବାକୁ ଚାହୁଁଛି। ତେଣୁ ରାଷ୍ଟ୍ରୀୟ ସ୍ବୟଂ ସେବକ ସଂଗଠନର ମୁଖ୍ୟ ମୋହନ ଭାଗବତ ମଧ୍ୟ ଶନିବାରଠାରୁ ଦୁଇ ଦିନିଆ ପଶ୍ଚିମବଙ୍ଗ ଗସ୍ତରେ ଅଛନ୍ତି।ତାଙ୍କର ଏହି ଗସ୍ତ ସମୟରେ ସେ ରାଜ୍ୟର ଯୁବକମାନଙ୍କୁ ଭେଟିବେ। ମହାକାଶ ଗବେଷଣା, ନାସା, ମାଇକ୍ରୋବାୟୋଲୋଜି, ମେଡିକାଲ ସାଇନ୍ସରେ ବିଦେଶରୁ ସଫଳତା ହାସଲ କରିବା ପରେ ଭାରତ ଫେରିଥିବା ଯୁବକମାନଙ୍କୁ ସେ ସାକ୍ଷାତ କରିବେ। ଏମାନେ ହେଉଛନ୍ତି ସେହି ଯୁବକ ଯେଉଁମାନେ ମେକ୍ ଇନ୍ ଇଣ୍ଡିଆ ଏବଂ ଆତ୍ମନିର୍ଭର ଭାରତ ଭଳି ଅଭିଯାନରେ ସହଯୋଗ କରୁଛନ୍ତି। ତାଙ୍କ ବ୍ୟତୀତ ଗୃହମନ୍ତ୍ରୀ ଅମିତ ଶାହା ମଧ୍ୟ ୧୯ ଏବଂ ୨୦ ଡିସେମ୍ବରରେ ପଶ୍ଚିମବଙ୍ଗ ଗସ୍ତ କରିବେ।
ଗୃହମନ୍ତ୍ରୀଙ୍କ ଗସ୍ତ ପୂର୍ବରୁ ଭାଗବତ ପଶ୍ଚିମବଙ୍ଗ ଗସ୍ତରେ ଯାଇଛନ୍ତି, ତେଣୁ ପଶ୍ଚିମବଙ୍ଗ ନିର୍ବାଚନ ପୂର୍ବରୁ ଏହି ଗସ୍ତକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି।
ସୂଚନାଯୋଗ୍ୟ, ଏହା ପୂର୍ବରୁ ବିଜେପି ଜାତୀୟ ଅଧ୍ୟକ୍ଷ ଜେ.ପି ନଡା ପଶ୍ଚିମବଙ୍ଗ ଗସ୍ତରେ ଯାଇଥିଲେ। ହେଲେ ତାଙ୍କ ଶେଭାଯାତ୍ରା ଉପରେ ଆକ୍ରମଣ କରାଯାଇଥିଲା। ତେବେ ତାଙ୍କ କାର ବୁଲେଟପ୍ରୁଫ ଥିଲା, ତେଣୁ ସେ କୌଣସି ଆଘାତ ପାଇ ନଥିଲେ । ଏହି ଘଟଣାକୁ ନେଇ ବିଜେପି, ଶାସକ ତୃଣମୂଳ କଂଗ୍ରେସ ଉପରେ ଅଭିଯୋଗ କରିଛି। ଏହି ଘଟଣା ସମ୍ପର୍କରେ କଠୋର ଆଭିମୁଖ୍ୟ ଗ୍ରହଣ କରି କେନ୍ଦ୍ର ଗୃହ ମନ୍ତ୍ରଣାଳୟ ଡିଜିପି ଏବଂ ରାଜ୍ୟ ମୁଖ୍ୟ ଶାସନ ସଚିବଙ୍କୁ ଦିଲ୍ଲୀ ଡକାଇଛନ୍ତି । ଏଥି ସହ ରାଜ୍ୟପାଳ ଜଗଦୀପ ଧନକଡ ମମତା ସରକାରଙ୍କୁ ନିଆଁ ସହ ନ ଖେଳିବାକୁ ଚେତାବନୀ ଦେଇଛନ୍ତି । ଅନ୍ୟପକ୍ଷରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ ବିଜେପିର ଅଭିଯୋଗକୁ ଖଣ୍ଡନ କରିଛି।
